निर्वाचन आयोगले बुधबार अर्थ मन्त्रालयलाई पत्राचार गर्दै आयोगको आर्थिक कार्यविधिअनुसार निर्वाचनको तयारी, सञ्चालन तथा व्यवस्थापनका लागि आवश्यक पर्ने रकम निकासाका लागि माग गरेको छ ।

निर्वाचन आयोग ऐन, ०७३ को दफा २७ र २८ अनुसार निर्वाचनको तयारी, सञ्चालन तथा व्यवस्थापनका लागि आवश्यक पर्ने रकम सात अर्ब सात करोड ९४ लाख ८० हजार रुपैयाँ निकासा गरिदिन मन्त्रालयलाई पत्राचार गरेको प्रवक्ता राजकुमार श्रेष्ठले जानकारी दिए ।

आयोगले विगतका निर्वाचनमा भएका खर्चभन्दा मितव्ययी हुने गरी कोभिड– १९ को महामारीसमेतलाई ध्यानमा राख्दै सोसँग सम्बन्धित सुरक्षा सतर्कता र न्यूनतम सुरक्षा व्यवस्थाका लागि मात्रै आयोगले ३७ करोड ४१ लाख ७४ हजार रुपैयाँ खर्चको प्रस्ताव गरेको छ ।

‘महामारीमा अपनाउनुपर्ने स्वास्थ्य सतर्कतासमेतलाई ध्यान दिई निर्वाचन सञ्चालन आर्थिक कार्यविधि तयार गरिएको छ,’ प्रवक्ता श्रेष्ठले भने ।

उनले थप भने ,‘नयाँ सामग्री, उपकरण र सवारीसाधन खरिद गर्ने गरी बजेटमा कार्यक्रम राखिएको छैन, निर्वाचनको काममा आयोग, ७७ वटै जिल्ला निर्वाचन कार्यालय, एक सय ६५ वटै निर्वाचन क्षेत्रमा निर्वाचन अधिकृतको कार्यालय र मतदान केन्द्रमा खटिने कर्मचारी न्यूनतम संख्यामा रहने व्यवस्था गरेका छौँ,’।

आयोगले विगतका निर्वाचनमा प्रयोग गरी हाल मौज्दातमा रहेका मतपेटिकालगायत विभिन्न उपकरण र सवारीसाधनहरू मर्मत गरी प्रयोग गर्ने व्यवस्था गरिएको जनाएको छ ।