कात्तिक १८,
काठमाडौं । नेपाली कांग्रेस केन्द्रीय कार्यसमितिको आकस्मिक बैठकले आज मंगलबारदेखि भोली बुधबार र पर्सी बिहिबार तीन दिनसम्म पार्टीको झण्डा आधा झुकाउने निर्णय गरेको छ । पार्टी सभापति शेरबहादुर देउवाको अध्यक्षतामा आज केन्द्रीय कार्यालय, बीपी स्मृति भवन, वीपी नगर, ललितपुरमा बसेको पार्टीको बैठकले सो निर्णय गरेको प्रेस विज्ञप्ति मार्फत मुख्य सचिव कृष्णप्रसाद पौडेलले जानकारी दिए ।
उनका अनुसार केन्द्रीय आमन्त्रित सदस्य एवं प्रतिनिधि सभाका सदस्य सूर्यबहादुर के.सी.को निधनप्रति गहिरो दुःख व्यक्त गर्दै शोक प्रस्ताप पारित गरिएको छ । त्यस्तै भोली कात्र्तिक १९ गते बुधबारका दिन केन्द्र तथा जिल्लाका सबै कार्यालयहरु बन्द गर्ने, स्वर्गारोहणको १३ औं दिनसम्म केन्द्रीय कार्यालय र सबै जिल्ला कार्यालयहरुमा शोक पुस्तिका राख्ने प्रस्ताप परित भएको छ ।
के.सी.को सोमबार राति १० बजे पोखरा महानगरपालिका वडा नं. ७ मुस्ताङचोक स्थित आफ्नै निवासमा निधन भएको थियो । स्वर्गीय के.सी.ले नेपालको उद्योग वाणिज्य तथा सामाजिक क्षेत्रमा उल्लेखनीय योगदान पुर्याएको पार्टीले स्मरण गरेको छ । पिता कीर्तिबहादुर के.सी. र माता पदमकुमारी के.सी. को ज्येष्ठ सुपुत्रको रुपमा वि.सं. २०१४ जेठ १० गते केसीको जन्म भएको थियो ।
के.सी. २०७४ को निर्वाचनमा समानुपातिक प्रणाली अन्तर्गत पार्टीका तर्फबाट प्रनिनिधि सभा सदस्य भएका थिए । उनको निधनप्रति नेपाली कांग्रेस केन्द्रीय कार्यसमितिले गहिरो दुःख व्यक्त गर्दै भावपूर्ण श्रद्धाञ्जली अर्पण गरेको छ । साथै, उनको आत्माको चीर शान्तिको कामनाका साथ शोक सन्तप्त परिवारजनमा कांग्रेसले हार्दिक समवेदना प्रकट गरेको छ ।
फेसबुक प्रतिक्रियाहरु