जुनेली न्युज, काठमाडौं। पौष १६ गते राष्ट्रिय मेलमिलाप दिवसको अवसरमा नेपाली काँग्रेसका सभापति तथा प्रधनमन्त्री शेरबहादुर देउवा गोकर्णेश्वर नगरपालिका वडा नं १ सुन्दरीजलमा रहेको बिपी संग्रालयमा आई विपीको शालिकमा माल्यार्पण गरेका छन्।

देउवा सहित काठमाडौं क्षेत्र नं ३ काँग्रेसका नेताहरुको उपस्थितिमा विपीको सम्झना र उनले ल्याएको मेलमिलाप नीतिको सम्मान स्वरुप सो कार्यक्रम भएको हो।

नेपालको सबैभन्दा ठूलो र पुरानो प्रजातान्त्रिक पार्टी कांग्रेसले जननेता वीपी कोइरालाको मेलमिलाप र एकताको नीतिको सम्झना गर्दै हरेक बर्ष पुस १६ गते यो दिवस मनाउने गरिन्छ ।

प्रजातन्त्र स्थापनाको लागि संघर्षरत वीपी कोइरालालाई तत्कालीन राजा महेन्द्रले मृत्युदण्डको सजायँ सुनाएपछि वीपी लगायतका कांग्रेस नेताहरु २०२५ सालमा भारत प्रवासमा गएका थिए । ८ बर्षको प्रवास जीवन त्यागेर कांग्रेस नेताहरु विक्रम संवत् २०३३ साल पुस १६ गते राष्ट्रियता जोगाउन मेलमिलापको नीति लिएर स्वदेश फर्किएका थिए ।

कोइरालाले नेपालका राजनीतिक दल र राजा मिलेर राष्ट्रियताको रक्षा गर्नुपर्ने अवधारणा अघि सारेका थिए । मेलमिलापको नीति लिएर वीपी कोइराला, गणेशमान सिंह, शैलजा आचार्य, खुमबहादुर खड्का लगायतका नेताहरु स्वेदश फर्किए पनि तत्कालीन राजा महेन्द्रले उनीहरुलाई त्रिभुवन अन्तराष्ट्रिय विमानस्थलबाटै पक्रेर जेल चलान गरेका थिए ।

राष्ट्रियता जोगाउन सबै पक्षबीच मेलमिलाप र एकताको आवश्यकता औंल्याएका वीपीको सिद्धान्तलाई कांग्रेसले पछिल्ला दिनहरुमा भूल्दै गएको कांग्रेस नेताहरुले नै बताउने गरेका छन्